"Healthcareers Day" vum Maacher Lycée
Aktualiséiert den
De 25. Februar huet de Maacher Lycée déi éischt Editioun vum "Healthcareers Day" am Machera Kulturzentrum organiséiert.
Dës Initiativ huet de Schüler vum Maacher Lycée eng interaktiv a spilleresch Immersioun an d'Welt vun de Gesondheetsberuffer gebueden. E ganze Moie laang konnten d’Schüler u verschidde Workshoppen deelhuelen déi d’ENSA (de fréieren LTPS) organiséiert huet: Wéi mécht een e Verband oder eng Bluttanalyse? Wéi gëtt de Bluttdrock gemooss? Wéi kann een eng Persoun reaniméieren? D’Schüler konnten och an engem Workshop, deen DeWidong geleet huet, d’Bedeitung vum Crew Ressource Management (CRM) verstoen an si konnten un enger Inforonn vun der ALEM (Lëtzebuerger Associatioun vun der Medezinsstudenten) deelhuelen a Froen iwwer Medezinsstudien stellen.
Den „Healthcareers Day“ ass zustan komm duerch den Asaz vum Maacher Lycée, vun der Maacher Gemeng a vun de verschidde Partner vum Grupp Healthcareers-On-Tour zu deem de Ministère fir Gesondheet a soziale Sécherheet (M3S), de Verband vun de Lëtzebuerger Spideeler (FHL), d‘Copas, d’ENSA , DeWidong an d‘ALEM gehéieren.